گندھارا ہندکو بورڈ تے گندھارا ہندکو کیڈمی دے تحت ہندکو تے دوسری مادری زباناں دی ترقی و تریج دا کم جاری و ساری اے۔ گندھارا ہندکو بورڈ دی اس محنت تے کوششاں نوں سراہندے اوۓ پاکستان پنجابی ادبی بورڈ نے اس خواہش دا اظہار کیتا کہ گندھارا ہندکو بورڈ جسراں باقی زباناں دی ترویج و ترقی وسے کم پیا کر دے اسی طرح اس نوں پنجابی دی بی تھوڑی خدمت کرنی چاہیدی اے۔
اس گہل نوں مدِ نظر رکھ دے ہوۓ پاکستان پنجابی بورڈ نے پنجابی دی لغت جیہڑی 2009 اچ چھپی ائی اُس دے دوسرے ایڈیشن نوں چھاپنڑے دی ذمہ داری گندھارا ہندکو بورڈ دے حوالے کردتی اے۔ دوسرے ایڈیشن دی رائلٹی بی گندھارا ہندکو بورڈ نُوں حاصل ہو سی۔
اس سلسلے اچ گندھارا ہندکو بورڈ دے جنرل سیکرٹری محمد ضیاء الدین تے پاکستان پنجابی ادبی بورڈ دی سیکرٹری پروین ملک دے درمیان معاہدے تے دستخط بی کر لتے گئے وُن۔
گندھارا ہندکو بورڈ اچ اس ڈکشنری تے کم جاری اے جیہڑا کہ عنقریب مکمل ہو کے منظر عام تے آ جاسی۔ مذکورہ لغت سردار محمد خاں دی مرتب کردہ وے جیہڑی کہ 2 جلداں تے مشتمل اے تے اس دے صفحات دی تعداد تقریبآ 4 ہزار اے۔ یاد رہوے کہ گندھارا ہندکو بورڈ گزشتہ 25 سال سی پاکستان دی ساری زباناں دی ترقی وسے کم پیا کر دے جس دی وجہ نال قومی یکجہتی نُوں فروغ پیا ملدا وے۔
