Event Description
قران پاک دے منظوم ہندکو ترجمہ دی تقریب
گندھارا ہندکو بورڈ پاکستان ہزارہ شاخ تے پریس کلب ایبٹ آباد مل کے قران پاک دے ہندکو ترجمہ دی تقریب پذیرائی منعقد کروائی۔ایہہ ترجمہ ملک عبدلغفور ملک مرحوم کیتا تے گندھارا ہندکو بورڈ اس کتاب آں چھپوایا۔اس تقریب دے مزمان خاص جناب ڈاکٹر محمد اظہر خان ایہے۔تقریب بچ صحافیاں،وکیلاں،محکمہ تعلیم دے افسران،طالب علماں تے ہور لوکاں شرکت کیتی۔ خاص مزماناں بچ حیدر زمان حیدر،پروفیسر یحیٰ خالد،سیعد ناز،اجمل نذیر تے قاضی ناصر بختیار شال ایہے۔ سٹیج سیکرٹری دی ذمہ داری پروفیسر ملک ناصر داؤد پوری کیتی۔تلاوت دی سعادت قاری مشتاق دے حصے بچ آئی تے نعت جنید مصطفیٰ بہوں سوہنڑی کر کہ پڑھی۔پروفیسر ناصر داؤد گندھارا بورڈ پاکستان دی ہزارہ دیاں لکھاریاں جوگے خدمات دا ذکر کیتا۔انہاں ساریاں کتاباں تے رسالیاں دی گل کیتی جڑہیاں بورڈ پیا چھاپدائے۔ایبٹ آ باد تے ہریپور بچ ہونڑے آلی کانفرنساں بارے بی دسیا۔احمد ندیم اعوان بورڈ دی تاریخ تے کماں تے روشنی پائی۔قران پاک دی خدمت بارے پروفیسر عبدلمتین تے پروفیسر شجاعت علی مقالے پڑھے۔پریس کلب دے صدر شاہد چوہدری اس عظیم کم تے ملک عبدلغفور دے کارنامے دی تعریف کیتی۔پروفیسر بشیر سوز مہماناں دا شکریہ ادا کیتا۔گندھارا بورڈ دی خدمات بارے گل بات کیتی۔مہمان خصوصی ایم این اے ڈاکٹر اظہر خان جدون بورڈ دی تعریف کردیوں اس دی کارکردگی تے کارنامیاں دی دل کھول کے تعریف کیتی۔انہاں ہندکو زبان دی ترقی جوگے کجھ مشورے بی دتے۔
2018
.
