Description

گندھارا ہندکو اکیڈمی دے تحت اِسی سال 2017ء اچ محترمہ آفتاب اقبال بانو دی ہِک تازہ تصنیف ’’آؤ ہندکو سکھنے آں‘‘ چھپ کے منظر عام تے آئی اے۔ اِس کتاب دے سرورق تے نظر پیندے ہی پتہ چلدا وے کہ زیر نظر کتاب ہندکو زبان دے گرائمر دے پیش نظر لکھی گئی اے کیونکہ کتاب دے ٹائٹل تے تختی نظر آندی اے جس اچ ہندکو دی حروفِ تہجی دے چند الفاظ ویکھے جا سکدین۔ اگر کسی نوں ہندکو بول چال، ہندکو گرائمر دے نال نال ہندکو زبان سیکھنڑے تے لکھنڑیں دا شوق ہووے تا اوہ اِس کتاب دا مطالعہ ضرور کرے کیونکہ ایسے افراد وسے ایہہ ہِک بہترین تے مفید کتاب اے۔ 151صفحات تے مشتمل اِس کتاب اچ کل چھبیس اسباق شامل اُن جناں نوں مصنفہ نے بڑی محنت تے مہارت نال ترتیب دِتا وے۔ اِس کتاب دے مطالعے سی بعد پتہ چلدا وے کہ مصنفہ نے ہندکو زبان دے کتنے الفاظ نوں اس اچ سمویا وے۔ کتاب اچ مزید کمال دی گہل ایہہ وے کہ ہر لفظ تے ہر جملے دا ترجمہ ہندکو دے علاوہ اُردو اچ بی کیتا گئیا وے تا کہ اوہ افراد جیہڑے ہندکو زبان نی سمجھ سکدے اُناں نوں بی سمجھ تے بوجھ حاصل ہو جاوے۔ کتاب اچ نہ صرف ہندکو دے الفاظ بلکہ ہندکو لسانیات دے حوالے نال بی کافی وضاحت دے نال فاضل مصنفہ نے مثالاں دِتیاں وُن۔ ایہہ کتاب ہندکو سکھنڑیں والیآں وسے ہِک اُستاد دا درجہ رکھدی اے۔ کتاب دے بیک ٹائٹل تے مصنفہ دی تصویر تے نال ہی اُناں دے حوالے نال اُناں دا مختصر تعارف بی پیش اے۔ کتاب اچ شامل گندھارا ہندکو بورڈ دے جنرل سیکریٹری جناب محمد ضیاء الدین صیب دی تحریر بعنوان ’’ہندکو دی آفتاب اقبال‘‘ کتاب دے حسن تے فاضل مصنفہ دی قابل ستائش محنت تے تصنیف نوں مزید تقویت تے جلا بخش دی اے۔

Book Available for Sale

Contact:

Gandhara Hindko Academy

2 Chinar Road, University Town Peshawar

091-9216223-24