’’عین شین قاف‘‘ ہندکو زبان دے نامور شاعر، ادیب تے محقق جناب ش۔ شوکت صیب دے شعری مجموعہ دا ناں اے جیہڑے حال اچ ہی گندھارا ہندکو اکیڈمی دے تحت چھپ کے منظر عام تے آیا۔ شوکت صیب دا ایہہ شعری مجموعہ کل 189صفحات تے مشتمل اے جد کہ اِس مجموعہ دا انتساب اُناں نے ہندکو زبان دے ناں کیتا وے۔ شوکت صیب دے اِس شعری مجموعہ اچ نعت، سلام، ملی شاعری، غزل، حرفیاں، گونڑ، نظماں تے مزاحیہ شاعری شامل اے۔ کتاب دا سرورق بی آپڑے عنوان دے پیش نظر بڑی محنت تے خوبصورتی دے نال بنڑایا گئیا وے ۔ ش۔ شوکت صیب کتاب اچ شامل عین شین تے قاف دے عنوان نال آپڑی تحریر اچ لکھدے وُن کہ’’ عین شین قاف ، عنوان اے میرے ہندکو مجموعہ کلام دا جیہڑا اللہ تعالیٰ دے خاص فضل تے کرم نال تے گندھارا ہندکو بورڈ دیاں کاریاں تے خواریاں نال آپڑے پڑھنے والیآں دے ہتھا ں وچ پہنچڑے دی معراج تے فائز ہوچکا وے۔ ایہ مجموعہ کلام اس ویلے تک محفوظ نئیں سمجھا جاسکدا اہیا جد تک ایہ چھپ کے منصہ شہود تک نہ آیا۔ شاعر جو کچھ کہندے اس نوں لکھت دا جامہ اس وسطے پواندے کہ اوہ اس نوں محفوظ بھی کرسکے تے جدو موقع ملے تا اپڑے قدر داناں دی خدمت وچ پڑھنے یا سمجھڑیں دی خاطر پیش بھی کرسکے برے جدو اس دا لکھا چھپ کے اپڑے پڑھنے والیآں دے ہتھاں تک پہنچدے تا شاعر نوں انج محسوس ہوندے جکرو اس نوں اپڑ ے صبر دا مٹھا پھل مل گیا ہووے‘‘۔ کتاب دے مطالعہ سی بعد پتہ چلدا وے کہ شوکت صیب دی شاعری فنی تے فکری لحاظ نال آپڑی مثال آپ اے، وزن تے روانی اِناں دے اشعار دا وطیرہ وے تے ہندکو دے ٹھیٹھ لفظاں دا استعمال موقع محل دے مطابق اِناں دا ہی کمال اے۔

Book Available for Sale

Contact:

Gandhara Hindko Academy

2 Chinar Road, Abdara Road, University Town Peshawar

091-9216223-24

More images

For more images, check out our complete gallery for this event.